Isifuba somoya siyisifo esingamahlala khona esithinta imigudu yomoya yamaphaphu. Isifuba somoya sibangela ukuba le migudu yomoya ivuvukale futhi inciphe ngezinye izikhathi.
Isifuba somoya sithinta abantu babo bonke ubudala futhi ngokuvamile siqala umuntu eseyingane. Sibangelwa yizinto eziningi (isibonelo, umoya ongcolile) okuzoxoxwa ngazo ngezansi. Lezi zimbangela zingabangela noma zenze izimpawu zesifuba somoya zibe zimbi nakakhulu, futhi ukuba kubi nakakhulu kwezimpawu zesifuba somoya kubizwa ngokuthi ukuhlasela kwesifuba somoya.
Lapho umuntu enesifuba somoya, kubalulekile ukuba abe nohlelo lokubhekana nesifuba sakhe somoya. Uhlelo lokubhekana nesifuba somoya ulwenza nodokotela wakho ukuze wazi lokho okumelwe ukwenze lapho wena noma ingane yakho ihlaselwa yisifuba somoya. Kulo, uchaza izinyathelo ozozithatha ukuze ulawule lokhu kuhlaselwa. Lokhu kukusiza ube nesu elicacile lwalokho ozokwenza.
Izimbangela
Isifuba somoya sibangelwa ukusabela ngamandla kwamasosha akho omzimba kulokho okubizwa ngokuthi yi-allergen emaphashini. Abanye abantu bangase bangasabeli nhlobo ngisho noma bechayeke ku-allergen efanayo.
Lokhu kusabela okunamandla kwamasosha omzimba kubangela ukuba imigudu yomoya ivuvukale, ibe mincane futhi ikhiqize izikhwehlela eziningi. Lokhu kwenza ukuphefumula kube nzima. Amamasela akha imigudu yomoya nawo ayancipha, okwenza kube nzima nakakhulu ukuphefumula lapho uhlaselwa isifuba somoya.
Izinto ezibangela isifuba somoya
Ukuchayeka ezimbangeleni kwandisa amathuba okuhlaselwa yisifuba somoya. Izimbangela ezihlukahlukene zinamazinga angalingani okubaluleka kuye ngesiguli:
- LIzifo zamaphaphu
- Ama-allergens: utshani, izihlahla, ukhula, izinambuzane zothuli, inkwethu yezilwane, amaphela, ukukhunta
- Indawo: umoya obandayo, inkungu, intuthu kagwayi, intuthu yezingodo
- Imizwelo: ukukhathazeka, ukucindezeleka
- Ukuzivocavoca, ikakhulukazi ezindaweni ezibandayo
- Imithi ethile njenge-aspirin
- Umsebenzi: uthuli, isikhunta, izinongo, amadayi, uplastiki, irabha
Kubalulekile ukuba uzazi izimbangela zakho ukuze ugweme ukuchayeka kuzo.
Izinkomba nezimpawu
Abantu baba nezinkomba nezimpawu kuye ngokuthi isifuba sabo somoya sibucayi kangakanani. Lapho isifuba somoya silawulwa kahle, umuntu uba nezimpawu ezimbalwa.
Izinkomba nezimpawu zesifuba somoya zihlanganisa
- Ukucinana kwesifuba
- Ukukhwehlela
- Ukuphelelwa umoya
- Ukunswininiza
Isifuba somoya ngokuvamile siba nezimpawu ezenzeka ngendlela efanayo:
- Izimpawu ziyafika ziphinde zihambe ngosuku olufanayo
- Ziba zimbi kakhulu lapho utheleleke ngesifo esinjengomkhuhlane
- Ziba zimbi kakhulu ebusuku noma ekuseni
Ukuvimbela isifuba somoya
Ukugwema izici nezimbangela ezithile eziyingozi kuyanconyelwa ukuze kuvinjelwe isifuba somoya singabi sibi kakhulu noma singabangeli ukuhlasela kwesifuba somoya. Ukwenezela kulokho, ukugwema ukuchayeka entuthwini kagwayi lapho ukhulelwe noma eminyakeni yokuqala ingane izelwe kunciphisa ingozi yokuthi ingane ibe nesifuba somoya kamuva ekuphileni.
Ukwelashwa kwesifuba somoya
Ukwelashwa kwesifuba somoya ngokuvamile kwenziwa ngama-inhalers. Lezi zihlukaniswa zibe yizilawuli kanye nezikhululi
- Izilawuli zinikezwa ukuze zisetshenziswe isikhathi eside nsuku zonke ukuze zivimbele izimpawu ngokunciphisa ukuvuvukala kwemigudu yomoya kanye nokuncipha kwayo
- Izikhululi zinikezwa ukuze kuncishiswe izimpawu phakathi nokuhlasela kwesifuba somoya.
Izilawuli nezikhululi (amaphampu esifuba somoya) ziqukethe umuthi onciphisa ukusabela kwamasosha omzimba, okube sekunciphisa ukuvuvukala.
Indlela yokuyisebenzisa kahle i-inhaler
Kubalulekile ukwazi indlela enembile yokusebenzisa umuthi wakho oyi-inhaler ukuze ulawule kangcono futhi unciphise izimpawu zesifuba somoya. Izinyathelo ezilandelayo zizoqinisekisa ukuthi usebenzisa izindlela ezifanele ze-inhaler:
- Susa isivalo bese uxukuza i-inhaler kakhulu
- Khipha umoya kancane nangokuphelele emaphashini
- Bamba i-inhaler ime iqonde
- Faka okungena emlonyeni phakathi kwezindebe ezivaliwe
- Chofoza isifutho kanye kuyilapho uqala ukudonsa umoya kakhulu
- Susa i-inhaler izindebe zisavaliwe
- Bamba umphefumulo imizuzwana engu-10 kuya kwengu-15
- Linda imizuzwana engu-20 kuya kwengu-30 ngaphambi kokuba ufuthe okwesibili
- Yakaza umlomo ngamanzi ngemva kokusebenzisa. Phimisa, ungagwinyi.
Amacebiso abalulekile okumelwe uwakhumbule:
- Hlale uhlola ukuthi umuthi wakho awukaphelelwa yisikhathi
- Hlola ukuthi ithini alisenalutho yini